好多人都希望知道最新嘅癌症治療資訊, 希望可以更有效控制癌症, 甚至根治癌症. 近年來最多人提及嘅就係免疫療法, 免疫療法最吸引人嘅地方, 一方面係越嚟越多臨床數據顯示其成效, 另一方面亦都是因為副作用相對比較溫和, 當中最吸引人嘅地方, 係免疫療法嘅理論在於透過使用藥物”重新啟動”自身失效對抗腫瘤嘅免疫系統, 這是眾多抗癌治療理論中最合理的方向, 但是醫學界仍努力尋找哪些人最適合用那些類型的免疫療法, 其實, 即使是醫學發達, 人類對免疫學的知識仍然停留在皮毛的階段, 可能仲要一段非常長的時間才能對這個配對過程掌握得更加極致, 所以, 整體而言, 免疫療法對大部分腫瘤的成效仍未是說得上非常高, 而且免疫療法非常昂貴, 並不是人人能負擔, 所以都令人非常頭痛!
經常打比喻, 如果將一個人打比喻成一隻船, 形成腫瘤就好像一隻船嘅船底破了一個窿在漏水一樣, 唔好好處理情況就會沉船. 治療腫瘤就好像幫隻船排走漏入隻船嘅水, 越有效嘅治療即是越有效嘅排水方法, 就唔會咁快沉船, 但其實最有效嘅方法係排走水嘅同時, 要封左正在漏水嘅窿!!
隻船之所以有個窿, 就係免疫力嘅缺口, 生得成腫瘤其實係要有千千萬萬個巧合, 每日正常細胞都有好多嘅基因突變, 如果當中有一些壞嘅突變嘅時候, 會有自我修復機制處理問題, 當這個系統出現問題嘅時候就會累積壞嘅突變而形成腫瘤! 所以, 醫病嘅同時, 努力改善免疫力可以令治療效果事半功倍!
一路以來, 科學家及醫學界都有好多唔同嘅理論分析人類免疫力下降嘅原因, 大概可以概括成以下原因: 壓力, 營養唔均衡, 缺乏運動, 吸煙飲酒, 過多添加食物以及濫用抗生素有關. 其實, 絕大部分有腫瘤的病人, 本身都有良好嘅生活飲食習慣, 所以壓力和缺乏運動似乎都係最多人隻船嘅窿!
其實, 壓力反應係人體保護自我嘅機制之一, 例如遇到突發情況, 壓力激發體能嘅變化有助人類逃生, 當生病時, 壓力可以鞭策免疫系統提升抗病毒抗細菌嘅能力! 但現今最大嘅問題係, 太多人”長時間”活在”高壓”嘅環境, 長期嘅壓力令到免疫系統出現負荷, 當真正有病嘅時候, 例如遇上形成腫瘤嘅時候, 個免疫系統”鞭極都鞭唔起”, 完全發揮唔到應有嘅作用!
所以正視壓力嘅處理, 適當嘅運動, 均衡嘅飲食都係癌症病人適合嘅自救方法! 但要切記, 過分緊張這些方法又會造成壓力 (變相自己中自己計), 所以要收順啲 + 戒做爛好人+ 適量地自救才是最好封船窿的理想方法! 要記緊, 一日唔封好個窿, 所有嘅治療效果都唔會持久, 因為大部分嘅癌症治療都係治標唔治本嘅方法 ( 食咗誠實豆沙包嘅腫瘤科醫生, 最叻倒自己米), 要治標治本一定要自己努力!
P.S. 如果有一日真係癌症絕跡, 我會好開心我失業, 大家不用擔心我, 以我嘅技能我仲可以做到好多其他工種
Comments