“睇症睇得慢” 係我嘅口頭禪, 每日門診加埋住院病人極其量可以照顧到20個病人 (未計病人 What’s app群組及其他群組查詢), 我絕對唔 HEA做, 其實做嘢已經係好快手, 好有效率 (自我感覺良好 mode中), 但係睇症睇得慢係因為差不多每個病人都要飲心靈雞湯……仲要係好補嘅湯!
好多病人覆診嘅時候就好似一個漏氣嘅公仔一樣, 睇症期間除咗了解病人最新狀態, 檢查病人,講解唔同嘅報告, 病情嘅進度, 治療嘅進度之外, 亦都會吹下水, 美其名”吹水”, 實質係慢慢地探索心靈嘅每一個櫃桶, 希望可以找到“心靈枷鎖”, 然後用時間同埋耐性同病人及其家人一步一步慢慢解鎖. 整個過程就好似”解死結”同”幫病人埋吹氣”一樣, 將個漏氣公仔吹返脹, 所以30分鐘根本做唔到咁多嘢, 有時新症病人要用兩個鐘!!! (在此亦希望向我的病人道歉, 因為他們有時等得好辛苦, 真的是非常不好意思, 但眼前病人有需要, 又不能見死不救……)
如果心靈枷鎖解鎖成功的話, 就好似搵到漏氣公仔喺邊度漏氣一樣, 封咗個窿之後加氣冇咁快洩氣, 一日未解到鎖, 都係要經常返嚟加氣.....所以必須要花多啲時間解鎖, 加咗嘅氣先至可以襟用啲!
經常打比喻, 心靈嘅枷鎖就好似一個”死結”一樣, 大家見到佢都覺得好惡搞, 要解死結需要大量耐性, 亦都要循序漸進, 首先要建立良好的醫患關係, 不單止同病人建立, 亦要與家人建立, 建立良好嘅醫患關係只係將個”死結”鬆一鬆, 然後每次覆診試下鬆一鬆個結, 有時候亦需要藥物輔助, 常見要用嘅藥物有鎮靜劑, 因為大部分病人都處於焦慮狀態, 有些比較嚴重的病人可能需要重一點的鎮靜劑, 才可以舒緩突發性的驚恐症, 有些病人更為嚴重，會處於抑鬱狀態, 便需要用一些”開心藥”, 那就是”血清素”, 即是抗抑鬱藥物, 由於腫瘤病人的情況比較複雜, 同時間有些病人亦需要用比較多嘅止痛藥, 有些乳癌病人亦要服用抗癌的荷爾蒙治療, 那麼腫瘤科醫生便要分析哪些精神科藥物是不適合服用的, 所以有些時候腫瘤科醫生亦係半個精神科醫生! 要熟悉精神科的藥物同腫瘤科常用藥物之間有什麼常見踩地雷的地方!
其實治療腫瘤已經係令病人非常心煩, 這個時候建議病人見心理科醫生及精神科醫生, 就好像要他們的心靈及荷包上百上加斤一樣, 所以腫瘤科醫生有些時候都要頂硬上, 做埋呢兩分, 因為絕大部分病人的焦慮源自對病情嘅唔了解 (甚至係曲解), 所以腫瘤科醫生應該係最適合解鎖嘅人, 如果情況嚴重的話，亦需要轉介精神科醫生作進一步跟進。
有好多病人擔心, 服食精神科藥物會上癮, 所以經常強調, 精神科藥物從來都係治標唔治本, 治本從來需要極大耐性, 從根本做起, 就是要解開心靈嘅枷鎖, 要一齊”的起心肝”解死結, 這些輔助的藥物, 只是讓解”死結”嘅過程比較順利一點, 如果監粗解鎖 (即是情況有需要用情緒藥物而避開用藥的話), 只會事倍功半.
其實最近由於疫情嘅關係, 加速咗好多病人漏氣嘅速度, 複診都密左, 希望可以透過這文章同大家分享, 如果大家有共鳴的話, 都可以留意一下自己漏氣嘅速度, 自救一下, 幫自己尋找一些放負嘅技能, 自己煲自己嘅雞湯, 可以的話, 多咗嘅雞湯甚至可以用嚟幫助身邊有需要嘅人, 一齊努力加油!
コメント