剛剛過去嘅一個星期, 見到大家喜歡我嘅文章, 我好開心,一直以來, 我都非常希望在診症室以外, 可以用我的專業, 用我的所見所聞, 我的感想分享出來, 希望可以支持正在水深火熱嘅病人.
寫文章是我減壓嘅方法之一, 我亦非常清楚對外用醫生身份分享文章有好處亦有壞處, 好處當然是有說服力, 減省病人需要對技術性文章 factcheck 的需要, 因為網上充斥著 fake news! 至於有關感想的文章, 希望為大家打打氣, 亦希望提提大家小心重蹈覆轍! 既然係網上嘅公眾平台, 亦歡迎各位留言, 好的壞的我都會接收, 希望能夠成為一個”樹窿”畀大家宣泄一下, 因為”負能量”對身體有害, 放得幾多就幾多!
自從更加多嘅人從Facebook認識我之後, 我和助手的日子並不好過啊!!! 我們本身已經係好忙, 現在更加係忙上加忙 (多咗好多唔同渠道嘅查詢). 我們經常在診所忙到自言自語同埋傻笑…..或者簡單地同大家分享一下我嘅日常, 每天返到診所還未到九點, 便開始”交易現場”時段, 先係處理大大小小文件 (處理醫療報告, 保險文件, 部分What’s App 病人群組查詢事項……因為24小時不斷累積中), 九點開始睇症……無間斷睇到六點, 有時上午時段及下午時段在不同診所進行, 診症期間, 除了處理坐在面前的病人之外, 還有其他醫生,醫院, 病人, 病人家屬, 朋友, 老師, 校友, 唔識嘅人致電…… (最特別嘅地方, 大家都是希望即時通電, 但 Cindy只係有一個), 大大小小唔同緊急程度嘅事都在診症期間穿插着我的思想. 診所時段完結之後, 我才開始我的下半場……到不同的醫院巡房, 處理電療設計直至夜深, 期間病人What’s App 群組已經累積數以百計問題……我非常明白每一位想與我直接通話嘅人都係有重要嘅事, 但緊急程度各有差別, 我經常提醒大家, 所有事情最好集中在群組內討論, 因為即使在電話討論, 大家都有慣性忘記內容的習慣, 所以我必須要定立善良的底線, 才能有效率地處理所有問題, 要不然, 多多 Cindy EE 都唔夠.
為何是”善良”的底線? 其實絕大部分的病人都是非常非常合理的, 只有個別病人或者家人會偶然有不合理的要求. 或者大家可能會覺得私家醫生冇公立醫院醫生咁忙, 又或者誤以為私家醫生=私人醫生, 可以隨傳隨到……實情係, 現在應該有幾千人有我嘅電話號碼, 一個可以直接”刮”到我嘅電話號碼, 如果可以有獎的話, 應該可以頒個”勇氣可嘉獎”畀我, 因爲我從來未想過退縮, 從來冇因爲我越來越忙而取消病人群組嘅安排, 冇因為忙而取消義診, 亦冇因為忙而減少寫文章, 所以我每日嘅工作量有增無減, 並不是大家想象中的”輕鬆”, 所以我必須定立”善良”的底線, 拒絕做”爛”好人, 才能持之以恆地運作, 可以的話, 我希望用呢個方式可以做到老……現在的我還未到40歲啊! 雖然我真係老得好快
除咗”善良”的底線, 新症病人的安排亦有新的編排, 為了希望將我的小宇宙發揮到最盡, 我會主力集中照顧乳癌病人, 偶然會照顧腦癌及頭頸癌的病人, 因為腫瘤資訊真的是日新月異, 集中照顧某類型病人可以減省用大量時間 update不同種類的資訊, 要知道學海無涯, 現在醫學新資訊發達的程度更加是匪夷所思, 必須集中火力某些範疇才能提昇效率!
我知道我是一個非常幸福的醫生, 我身邊都充滿著愛惜我的病人, 大家都經常提醒我要小心身體, 大家都擔心我遲早出事! 我必須要調整, 定立善良的底線, 調整Cindy EE 的日常, 專心照顧信任我的病人, 一起繼續每天成長, 共勉之!
Comments