在木屋區出生，石俠尾臨時房屋區 （現址為城大學生宿舍）渡過童年繼而在香港仔公屋成長直至成為醫生。可以算得是土生土長的草根階層，當年有幸入讀港大醫學院，阿爸阿媽嚇到下巴都跌左落地下！因為佢地真心冇諗過阿女竟然可以入到醫學院！佢哋堅係以為我講笑！
睇過少少關於香港愛情故事嘅 Trailer, 知道有好多人唔喺好睇得起在公屋出身嘅人，其實香港有好多醫生都係公屋出身，只係我地唔會周街同人講我哋喺公屋大！
能夠成為一個醫生，的而且確可以幫我的家脫貧，從前媽媽是清潔女工，經常被人欺負，所以當年考完醫學院畢業試有時間的時候，第一時間衝去勞工處同佢間公司玩野！ 爸爸更犀利，佢經常講笑話，低下階層的工種除咗做賊之外佢已經做過哂！真係冇誇張，我爸爸做過花王，地盤工人，街邊檔小販，燒味工人，裝修管工，旅遊巴司機，的士司機，私人司機......不能盡錄！
成為醫生，除咗可以脫貧，亦可以慢慢地"離地", 但是在這個過程當中，我感覺上覺得"貼地"比較適合我！因為我有一條“妹仔脷”！幾千蚊一支洒不及90蚊一支洒好飲，坐係度慢慢食貴野不及15分鐘食個車仔麵好味！
除此之外，"藍血”的環境"不是太適合我 (blue blood 即是貴族的意思），每當同blue blood 醫院/人溝通, 總是覺得我哋喺唔同時空嘅！如果做多幾步，會比人覺得 cheap cheap哋，我寧願繼續cheap落去,停留在自我感覺良好mode中。
我現在還是喜歡做熱血貼地 Cindy EE mode! 希望從我這個角度寫出來的文章適合大家閱讀！當然我不排除將來會轉mode, 但我亦希望是向好的轉變，真心希望能夠做到昨天的我是這樣，今天的我是這樣，將來的我也是這樣！
Comments